[1]

Kabhi kabhi Aashvi sochti hai...

Kya har kisi ki zindagi mein koi aisa insaan hota hai...

Jiske paas jaate hi dil ko sukoon mil jaata hai?

Aashvi ko mila tha.

Uska naam tha...

Diti.

Diti aur Aashvi ka rishta janam ka nahi tha...

Phir bhi na jaane kyun...

Unke bina har khushi thodi adhoori si lagti thi.

Kabhi kabhi darr lagta tha...

Agar ek din woh paas na rahi toh?

Kya Aashvi waise hi muskura paayegi?

Kya woh waise hi jee paayegi?

Shayad Diti ke paas bahut log the...

Unhe pyaar karne wale...

Unke apne.

Lekin Aashvi ki duniya...

Bas kuch hi logon mein simat kar reh gayi thi.

Aur un sab mein...

Sabse khaas jagah Diti ki thi.

Phir bhi ek sawaal roz dil se takraata tha...

Aakhir aisa kya tha Diti mein...

Jo har baar sabse pehle unhi ki yaad dilata tha?

Kabhi mann karta tha...

Dil ki har baat unhe bata de.

Aur kabhi lagta tha...

Kuch baatein bas dil mein hi rehne de.

Pata nahi kyun...

Apne dil ki baat kehne se darr lagta tha.

Lekin jaise hi Diti saamne aati...

Aashvi khud hi ek khuli kitaab ban jaati.

Jo baatein poore din kisi se nahi keh paati...

Woh bina soche Diti ko bata deti.

Din bhar dimaag mein hazaaron khayaal chalte rehte...

Lekin unke paas baithte hi...

Aisa lagta tha jaise andar ka saara shor ek pal mein khamosh ho gaya ho.

Na kabhi paison se matlab tha...

Na kisi mehange tohfe se.

Log kehte hain paisa bahut zaroori hota hai.

Lekin Aashvi ke liye...

Paisa bus ek kaagaz ka tukda tha...

Na jaane kitni baar...

Aashvi ne fut fut kar rote hue din nikale hain.

Sirf isliye...

Kyuki Diti uske paas nahi thi...

Logon ko shayad lagta hoga...

Ki Aashvi ko ghoomne phirne ka bahut shauk hai.

Lekin sach toh ye tha...

Aashvi ko jagah se kabhi pyaar tha hi nahi.

Usse toh bas Diti ke saath waqt bitana pasand tha.

Chahe ghar par baithna ho...

Ya kahin door jaana ho...

Unke saath hona hi uske liye sabse khoobsurat baat thi.

Sabse zyada dard...

"Bye" bolne mein hota tha.

Jab bhi Diti se milne ka sochti...

Ya unke saath thoda sa waqt bitane ka...

Dil khushi se bhar jaata tha.

Lekin jaise hi wapas jaane ka waqt aata...

Aankhen khud hi bhar aati thi.

Har baar.

Har ek baar.

Dil bas ek hi baat poochta...

"Bhagwan... itna kam waqt hi kyun?"

Kabhi kabhi toh sach mein lagta tha...

Kaash waqt thoda aur ruk jaata.

Diti ko shayad kabhi andaaza bhi nahi hoga...

Unke saath thoda sa waqt bitane ke liye...

Aashvi ne kitni baar classes miss ki...

Tests chhode...

Aur exams tak side mein rakh diye.

Lekin apni feelings bhi toh kis haq se batati?

Aaj tak Aashvi ko ye samajh nahi aaya...

Ki Diti par itna haq jatane ka haq tha bhi...

Ya nahi.

Haan...

Kabhi kabhi complain bhi ki.

Kabhi naraz bhi hui.

Lekin har complain ke peeche...

Sirf unke saath thoda aur waqt bitane ki khwaish thi.

Shayad Diti us baat ki gehraai kabhi samajh nahi paayi.

Ya shayad...

Aashvi kabhi apni baat theek se samjha hi nahi paayi.

Aur aaj...

Kabhi kabhi Aashvi ko lagta hai...

Shayad Diti ki zindagi mein uski jagah utni khaas nahi hai...

Jitni Aashvi ki zindagi mein Diti ki hai.

Kabhi lagta hai...

Shayad unki priority list mein Aashvi bahut peeche hai.

Aur kabhi...

Ye bhi lagta hai ki shayad woh zaroorat se zyada hi soch leti hai.

Ye soch sahi hai ya galat...

Ye Aashvi nahi jaanti.

Lekin dil ko samjhana itna aasaan bhi toh nahi hota.

Bas itni si khwaish hai...

Ki Diti hamesha muskuraati rahein.

Aur Aashvi ko unke saath...

Thoda aur waqt milta rahe.

.

.

.

Just the Two of Us

Har rishta lafzon mein samjhaya nahi ja sakta.

Kuch rishte bas dil se mehsoos hote hain.

Yeh kahaani hai ek beti aur uski Maa ki.

Un chhoti chhoti baaton ki...

Jo shayad duniya ke liye aam ho...

Lekin Aashvi ke liye...

Wahi uski sabse khoobsurat yaadein hain.

Yeh sirf ek kahaani nahi...

Yeh un har lamhe ke liye ek chhota sa thank you hai...

Jo Diti ne kabhi jaan kar...

Aur kabhi bina jaane...

Aashvi ki zindagi ko itna khoobsurat bana diya.

❤️‍🩹❤️‍🩹

.

.

.

Author's Note

Just the Two of Us ek fictional story hai.

Is story ke characters, names, situations aur dialogues sirf isi kahaani ka hissa hain.

Agar kahin koi similarity lage, toh use sirf coincidence samajhna.

Bas ek chhoti si request...

Is story ko pyaar se padhna aur har character ki respect karna.

Happy Reading! 🤍